اشتغلت دي بفتح التاء والغين يعني مش المقصود بيها اشتغلت بتاعت فؤاد المهندس في عائلة زيزي و المكنة طلعت قماش وكده لا.................اقصد اني اشتغلت ... و ده حدث جليل لازلت احاول تصديقه و استيعابه ....
العمل في عيادة نفسية
لحد قبل التدوينة اللي فاتت بشوية كده يعني بعد ما النتيجة ظهرت و خدت الليسانس كنت بقعد اوقات طويلة جدا اقول لنفسي انا ايه اللي دخلني الكلية دي و ايه اللي خلاني اختار العلم النفس ده حتى لو بحبه شوية كتب كانوا ممكن يبقوا كفاية انما اربع سنين و شهادة تخصص في علم النفس .... ليه عملت في نفسي كده............
دلوقتي بقول حاجة تانية خالص ..... بقول الحمد لله اني اخترت التخصص ده و بقول الحمد لله انها مش هواية و انها شغلتي و بقول انها احسن شغلانة في الدنيا كمان و ان كليتي دي مفيش زيها في الكون و علم النفس ده مالوش مثال في الارض .... حد مش عاجبه ؟؟؟
من شهر
عدى دلوقتي اول شهر على شغلي في العيادة النفسية و قبضت كمان اول مرتب صحيح هو مرتب رمزي شوية بس مش ده المهم يعني - على اساس اني بنت مش مادية و مش بهتم بالماديات و الفلوس- و اللي لازم اقوله ان الشغل خرجني من حالة اكتئاب و غلاسة و لا مبالاة الى حالة مختلفة تماما
اخرجني الى احساس اني شخصية مهمة بالنسبة لبعض الناس و ان تاثيري يظل معهم عبر الجلسات و انهم يرددون كلماتي يهتمون بآرائي و ينفذون تعليماتي .... و اني بعمل حاجة بحبها و بستمتع بيها و بقدر اعملها .... و اني فهمت حاجات كتيييييييييير اوي مكنتش فاهماها و كان ممكن مافهمهاش لو مااشتغلتش الشغلة دي...
عشان اللي مش عارف يعرف
عشان ممكن ناس كتير تكون مش فاهمة انا بشتغل ايه اصلا و لا ليه انا حاسة بكل الفخر و و الفرحة دي ..
انا بشتغل اخصائية نفسية بشترك في عمل جلسات علاج و ارشاد نفسي ...طبعا العيادة بتاعت حد تاني لاني مش هقدر اعمل عيادة مرخصة باسمي غير بعد الدكتوراه دعواتكم بقى
...و من غير ما اشرح انتم اكيد فاهمين الناس بتلجأ للعيادة النفسية ليه .. و بيكون شكلها ايه ؟؟
اول يومين صاحبني الاكتئاب و الاندهاش من طبائع الناس و مشاكلهم و تأكد لي ان ده هو الاحتكاك
الحقيقي بالناس ... و ان دول هم الناس بحق و حقيقي ... من غير تزويق او تكليف او تزيين... و تأكد لي اني مهما عرفت ناس و حسيت اني عارفاهم اوي ... في ملايين الاشياء التي لاتخطر على بالي تؤلمهم و تؤذيهم و تشغلهم و تنغص عليهم حياتهم ...
لا أنكر اني لم اتصور كل هذه المشكلات في حياة البشر و لا انكر اني تفاجأت بالمشاكل في انواعها اكثر من دهشتي بكمها....
و لا انكر دهشتي بأهمية المعالج بالنسبة للمريض ...
- ان تكون معالج نفسي يعني تتعامل مع المشاكل الاكثر خصوصية و حساسية بالنسبة لاي فرد
- ان تكو ن معالج نفسي يعني تفهم ان اي حد قبل ما يجيلك تعب كتير جدا و بحث في دوائره و محيط معارفه و اقاربه و اصحابه بحثا عن ملجأ او حل او خيط يخرجه مما هو فيه ايا كان
ان تكون معالج نفسي يعني شخص يتوسم من يزوره انه سيخرجه من مشاكله و ينتشله منها انتشالا سحريا موجدا له الحل السوبر للتغلب على كل المشاكل الواقعية و غير الواقعية
ان تكون معالج نفسي يعني شخص المفروض قادر على استيعاب الاخر و اشعاره بالراحة و الالفة في الدقائق العشرة الاولى من المقابلة
ان تكون معالج نفسي يعني تبحث لخزانة شخص متكتم عن مفاتيح تدخلك لما جاء من أجله و ما يحتاجه ليرتاح
ان تكون معالج نفسي .... حاجة مش سهلة بجد و مسؤلية كبيرة و موضوع طلع اكبر مما تخيلت ....على الرغم من ان استمرار نفس الافراد في جلساتهم يشعرني بالنجاح نوعا ما ...
اللي لازم تعرفوه
اني ايقنت تماما بفضل الله و رحمته بي .... لاني جنب المشاكل اللي بشوفها معنديش مشاكل اصلا و لا عندي شئ ينغص علي حياتي او يضايقني ... و اني لومش حمدت ربناعلى نعمة العافية من كل المصايب اللي مش عندي ابقى ناكرة كبييييييييييييييرة اوي للجميل
....
دي مش كل خواطري عن الشغل بس مستعجلة دلوقتي .. و اكيد المرات الجاية هتحمل الكثير من الخبرات و الخواطر حول العمل في العيادة النفسية....
دعواتكم بقى و كل عام و انتم إلى الله أقرب
